ثوذارث ن سيذنا براهيم س ثمازيغث ن أرّيف (ثريفيث)

صنّط إِ ڒبْعَاض ن لْأَيَاث زِي سُّوْرَا ؤُمِي قَّارن إِمزْوُوْرَا زݣ وُوْذم وِيس 11 اَڒ 25۔ ثسَّاوَاڒ خ ڒِيَّام ن سِيذْنَا بْرَاهِيم، ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔

غر ذَانِيتَا خ مَامّش يرزُّو سِيذْنَا بْرَاهِيم اَذ يسنْجم ثَنْدِينْت ن سَدُوم ذ ثنْدِينْت ن عَمُوْرَا زِي لْغَضَاب ن أَربِّي۔ ئِبَان-د غَارس سِيذ أَربِّي ذ ثْنَاين لْمَلَائِكَاث اَكِذس۔ مَانَايَا اَقَا-ث ذݣ وُوْذم وِيس 18 زِي لْأَيَا 20 اَڒ 33: ينَّا أَربِّي: "تسْڒِيغ خ ثنْدِينْت ن سَدُوْم ذ ثنْدِينْت ن عَمُوْرَا بلِّي يكْثَار ذَايْسنْت شّرّ أُو ڒمْعَاصِي ن يِوْذَان نْسنْت مْغَارنْت س وَاطًّاس۔ أَذ د هْوِيغ حمَا اَذ ژرغ بَاش اَذ سّْنغ نِيشَان مَانَاوِيَا مَا ذ صَّح نِغ لَّا۔" ؤُيُوْرن ثْنَاين ن يِوْذَان نِّي [يعْنِي لْمَلَائِكَاث نِّي] هْوَان ذِي جِّيهت ن ثنْدِينْت ن سَدُوْم، مَاشَا سِيذْنَا بْرَاهِيم يقِّيم يبدّ زَّاث إِ سِيذ أَربِّي۔

ئِقَرّب غَار أَربِّي ينَّا-ٱس: "أَذ تنْغذ ونِّي يتݣّن ڒْخِير اَكذ ونِّي يتݣّن شّرّ؟ ئِي مڒَا ثُوْفِيذ ذِينِّي ذِي ثنْدِينْت خمْسِين زݣ يِنِّي يتݣّن ڒْخِير، مَا ٱذ ترْذم ثَنْدِينْت اَمن تكْمڒ أُو وَار خَاس ثْعفُّوْذ ذِي طُّوْعَث ن خمْسِين نِّي؟ أَذ ثتْغذ بَاب ن ڒْخِير اَكذ بَاب ن شّرّ؟ ڒْخدّْنِّيت اَذ تَافذ اَم بَاب ن ڒْخِير اَم بَاب ن شّرّ۔ أُو شك ذ ڒْقَاضِي ن ثْموُرْث اَمن تكْمڒ، ئِخصَّا اَذ تْحكْمذ س ڒْحَقّ۔"

ينَّا-ٱس أَربِّي: "مڒَا ؤُفِيغ ذِي ثنْدِينْت ن سَدُوْم خمْسِين زݣ يِنِّي يتݣّن ڒْخِير، أَذ عفُّوْغ خ ومْشَان نِّي اَمن يكْمڒ ذِي طُّوْعَث نْسن۔"

يَارَّا-د خَاس سِيذْنَا بْرَاهِيم: "ڒخُّو نش قَا رنِّيغ سِّيوْڒغ اَكِذش اَڒ سِيذِي أَربِّي، وَاخَّا نش غِير زݣ وشَڒ وَاهَا۔ ئِي مڒَا ثنْقص خمْسَا زِي خمْسِين؟ أَذ ثنْغذ ثَنْدِينْت اَمن تكْمڒ ذِي طُّوْعَث ن خمْسَا؟

يَرَّا-د خَاس: "مڒَا ؤُفِيغ ذِينِّي غِير خمْسَا أُو اَربعِين وَاهَا وَار نقّغ شَا ثَنْدِينْت اَمن تكْمڒ۔"

ئِسِّيْوڒ عَاوذ غَارس ينَّا-اَس: "ئِي مڒَا ثُوْفِيذ ذِينِّي اَرْبعِين وَاهَا؟"

يَارَّا-د خَاس ينَّا-ٱس: "وَار ت نقَّغ شَا ذِي طُّوْعَث ن اَرْبعِين۔"

ينَّا-ٱس عَاوذ سِيذْنَا بْرَاهِيم: "ئِخصَّا وَار خَافِي تْخيّْقذ، يَا سِيذِي أَربِّي، اجّ-اَيِي اَذ كمّْڒغ اَوَاڒ ينُو۔ ئِي مڒَا ثُوْفِيذ ذِينِّي غِير ثْڒَاثِين؟"

ينَّا-ٱس أَربِّي: "وَار ت نقّغ شَا مڒَا ؤُفِيغ ثْڒَاثِين۔"

ينَّا-ٱس: "ڒخُّو بْذِيغ رنِّيغ اَكِذش ذݣ وَاوَاڒ۔ ئِي مڒَا ثُوْفِيذ ذِينِّي غِير عِشْرِين؟"

ينَّا-ٱس: "وَار ت نقّغ شَا ذِي طُّوْعَث ن عِشْرِين نِّي۔"

ينَّا-ٱس: "ئِخصَّا وَار تْخيّْقذ، أَذ سِّيوْڒغ اَمُوْر-أَ وَاهَا، ئِي مڒَا ثُوْفِيذ ذِينِّي غِير عشْرَا؟"

يَارَّا-د خَاس: "وَار ت نقّغ شَا ذِي طُّوْعَث ن عشْرَا۔" أَڒْمِي يكمّڒ أَربِّي ڒْهَرْد نّس اَكذ سِيذْنَا بْرَاهِيم أُوْشَا يتْدُوْرِّي، أُوْشَا يعْقب سِيذْنَا بْرَاهِيم غَار ومْشَان نّس۔