Ṣenneṭ i ssura umi qqaren Yunes. Ṯessawaȓ x ȓiyyam n Siḏna Yunes, ṯtarjem ḏanita s ṯmaziɣṯ n Arrif, iƹni ṯarifiṯ.
Ɣer ḏanita x Siḏna Yunes wami ḏas iȓaɣa Siḏi Arebbi aḏ ibeccar ṯandint n Ninwa bac aḏ tuben zi ȓmuƹṣiyaṯ nsen. Manaya aqaṯ ḏeg wuḏem wis 1 n ssura n Yunes: Yumar Siḏi Arebbi Yunes, inna-as: "Kkar, ruḥ ɣar ṯendint n Ninwa ṯameqqrant iy d yusin ḏi jjihet n ccarq, ṯsiwḍeḏ awaȓ inu ɣares minzi ccerr n imezḏaɣ nnes yiweḍ-ayi-d." Maca Yunes ikkar irweȓ zi Siḏi Arebbi. Uca ihwa ɣar ȓebḥar n yij n ṯendint umi qqaren Yafa mani yufa ij n ṯɣarrabut aḏ traḥ ɣar yij n ṯendint umi qqaren Tarcic iy d yusin ḏi jjihet n lɣarb. Ixeǧes Yunes amcan nnes, igaƹƹeḏ ḏi ṯɣarrabut akeḏ ibaḥriyen minzi ixes aḏ irweȓ zi Siḏi Arebbi.
Ȓxeddnnit issekk-d Siḏi Arebbi ij usemmiḍ ijheḏ, ihweȓ zzayes ȓebḥar ḥetta aȓ mani ƹȓaḥaȓ aḏ trez ṯɣarrabut. Ggwḏen ibaḥriyen u ibḏa kuȓ ijjen zzaysen isɣuyiw itettar s arebbi nnes, ɣeḍȓen ȓeḥwayej zi ṯɣarrabut ɣar ȓebḥar bac axas sneqsen dqeȓ. Maca Yunes, netta tuɣa-ṯ iṭṭeṣ ḏeg waǧeɣ n ṯɣarrabut. Yusa-d ɣares bab n ṯɣarrabut inna-as: "Mayemmi ṯeṭṭṣeḏ? Kkar, ṯettareḏ s Arebbi nnec imken aḏaneɣ ifekkar ḥima war netmetti ca." Uca nnan i wayawya: "Yallah, a neḥseb bac a nexzar wi ḏaneɣ isebben ḏi lbala-ya. Umbaƹd ḥesben yusa-d ȓeḥsab ḏeg Yunes. Nnan-as: "Xebbar-aneɣ mayemmi ḏaneɣ ṯeḥkem lmuṣiba-ya? Mant ȓxeḏmeṯ nnec? Manis d ṯusiḏ? Manis ṯamurṯ nnec? Ug iǧan ḏ ȓgens nnec?"
Yarra-d xasen: "Nec zeg yiwḏan n Bani Israʼil. Ƹebbḏeɣ Siḏi Arebbi, lʼilah n ujenna, wenni ig ixeȓqen ȓbarr ḏ ȓebḥar."
Iwḏan nni ggwḏen aṭṭas aȓmi ṯen ixebbar belli netta irweȓ zi Siḏi Arebbi, nnan-as: "Mayemmi ṯeggiḏ manaya?" Umbaƹd sseqsan-ṯ: "Min ḏac ɣa negg bac axaneɣ ihedden ȓebḥar?" Minzi ȓebḥar tuɣa-ṯ ƹaḏ irenni ḏeg uhaji.
Inna-asen: "Ysim-ayi nḍarem-ayi ḏi ȓebḥar ḥima aḏ ihedden, ȓaḥeqqac nec aqayi mteyyqen belli nec ḏ ssabab n ȓbala-ya xawem d imersen."
Maca iwḏan nni war ḏas ggin bu array, xsen aḏ sufɣen ṯaɣarrabut ɣar ṭṭarf n ȓebḥar. Maca war ḏas zemmaren ca minzi ȓebḥar ihweȓ xasen aṭṭas. Uca bḏan sɣaṯan ɣar Siḏi Arebbi: "Ay Arebbi, war ḏaneɣ neqq ca ḏi ṭṭuƹaṯ n ṯuḏarṯ n bnaḏem-a. Ntettar-ac ƹaweḏ bac war ḏaneɣ tḥessibeḏ x iḏammen nnes minzi cek a Siḏi Arebbi, ṯeggiḏ min ṯexseḏ." Umbaƹd ṭṭfen Yunes nḍaren-ṯ ḏi ȓebḥar, ȓxeddnnit irsa ȓebḥar. Ggwḏen yiwḏan nni aṭṭas zi Siḏi Arebbi. Ṭṭfen qeddmen teḍḥiyeṯ i Arebbi uca mƹahhaḏen akiḏes. Maca Yunes, isewjeḏ-as Arebbi ij n usȓem ḏ ameqqran bac aṯ iseɣȓi. Ikka Yunes ḏeg uƹeddis n usȓem ṯeȓt-iyyam.
